Барча юртдошларимизни шу кунларда кенг нишонланаётган Рамазон ҳайити ва Наврўз айёми билан самимий табриклаймиз.

Рамазон ҳайити – улуғ байрам. Шунинг учун бундай улуғ айём кунлари яқинларимизни йўқлаб, уларнинг ҳолидан хабар олиш, ёши улуғларни зиёрат қилиш, муҳтожларга меҳр-мурувват кўрсатиш мақсадга мувофиқдир.

Меҳр-мурувват ва садақанинг эса катта-кичиги бўлмайди. Табаррук китобларимизда ёзилганидек:  “Биродарингнинг юзига табассум билан қарашинг садақадир, яхшиликка буюришинг садақадир, ёмонликдан қайтаришинг садақадир, йўлдан адашган кишини тўғри йўлга солиб қўйишинг садақадир, кўзи ожиз кишига ёрдам беришинг садақадир, йўл устида ётган тош, тикан ёки суякни олиб ташлашинг садақадир, челагингдаги сувдан биродарингнинг челагига қуйиб беришинг садақадир”.

Давлатимиз раҳбари Шавкат Мирзиёев  ўзининг "Ватан ва халқ ҳақида ўйлар" китобида алоҳида таъкидлаганларидек, “Ҳаёт бор экан, жаҳолат ҳам, маънавий таҳдидлар ҳам бўлиши табиий. Аммо энг хатарлиси - юрт келажагига лоқайдлик, эзгу қадриятларга нисбатан бепарволикдир”.

Раҳмат ва мағфират нурлари ёғиладиган ушбу саодатли кунларда юртдошларимизнинг Ватанмиз келажагига дахлдорлик туйғуси янада мустаҳкамланиб, эзгу қадриятларга эътибори янада ошмоқда.

Кам таъминланган ва эҳтиёжманд оилалар, ногиронлиги бўлган шахсларга моддий ва маънавий ёрдамлар кўрсатилаётгани, эл-юртимизнинг тинчлиги, бахти ва келажаги учун дуойи фотиҳалар қилинаётгани ушбу айёмларнинг файз-у тароватини янада оширмоқда.

Донишманд халқимиз топиб айтганидек, йилнинг қандай келиши баҳоридан билинади. Ўтаётган кунларга разм солсак, жорий йилимиз ҳам хайрли ва барокатли бўлади. Ёмғирли ва офтобли кунларнинг мутаносиб равишда ёнма-ён келаётгани юртдошларимизнинг байрамона кайфиятига янада кўтаринкилик бағишламоқда.

Халқимиз баҳор шодиёналарини бу йил “Наврўзни улуғлаш – инсонни улуғлашдир!” деган эзгу ғоя асосида кўтаринки руҳ ва эзгу орзулар билан кенг нишонламоқда.

Зеро, Наврўз юртдошларимизни бугунги тинч ва осуда ҳаётимизни қадрлаб, шукроналик туйғуси билан яшашга ундайдиган, жамиятда инсон қадрини янада юксалтиришга хизмат қиладиган суюкли байрамдир.

Ушбу муборак кунларда Яратгандан, энг аввало, эл-юртимизга тинчлик-хотиржамлик, қут-барака, мустаҳкам сиҳат-саломатлик, барчангизга оилавий бахт, узоқ умр, ўқиш ва ишларингизга равнақ ато этишини тилаймиз. 

Айёмларингиз муборак бўлсин!

Марказий сайлов комиссияси