Sayt test rejimida ishlamoqda

O‘ZBEKISTON RESPUBLIKASI
MARKAZIY SAYLOV KOMISSIYASI

Ko'rinish:

Shrift hajmi:

OʻZBEKISTON RESPUBLIKASI MARKAZIY SAYLOV KOMISSIYASI RAISI ZAYNIDDIN NIZAMXODJAYEVNING BRIFINGDAGI NUTQI

09.07.2023

170

msk_yangiliklari_in

MSK Matbuot markazi.

2023-yil 9-iyul

soat 9:00

Aziz Vatandoshlar!

Hurmatli brifing ishtirokchilari!

Xonimlar va janoblar!

 

Bugun, yaʼni 9-iyul kuni soat 8:00 da muddatidan ilgari Oʻzbekiston Respublikasi Prezidenti saylovida saylovchilarning ovoz berishi boshlandi.

 

Ertalab soat 8:00 da mamlakatimizda tashkil etilgan 10 ming 784 ta saylov uchastkasida Oʻzbekiston Respublikasi Davlat madhiyasi yangradi va saylovchilar ovoz berishga kirishdi.

 

Shuningdek, Oʻzbekiston Respublikasining 39 ta xorijiy davlatdagi vakolatxonalari huzurida tuzilgan 56 ta saylov uchastkasi, xususan, Sharq mamlakatlarida tashkil etilgan saylov uchastkalari ish boshladi.

 

Joriy yilning 28-iyundan 5-iyulgacha oʻtkazilgan muddatidan oldin ovoz berish imkoniyatidan 815 ming 313 nafar saylovchi foydalandi, jumladan, 180 ming 729 nafari xorijda, 634 ming 584 nafari respublika ichida ishtirok etishdi.

 

Ayni paytda Markaziy saylov komissiyasi bilan barcha saylov okruglari va saylov uchastkalari oʻrtasida muntazam aloqa yoʻlga qoʻyilgan.

 

Ovoz berish birinchi boʻlib Oʻzbekiston Respublikasining Yaponiya, Janubiy Koreya, Xitoy, Malayziya, Singapur, Indoneziya, Tailand, Hindiston va Rossiyaning Uzoq Sharqdagi vakolatxonalari huzurida tashkil etilgan saylov uchastkalarida boshlandi.

 

Joriy yildagi saylovda saylovchilar roʻyxatiga jami 19,5 milliondan ortiq saylovchi kiritilgan.

 

Oʻzbekiston Respublikasi Prezidenti saylovida toʻrtta siyosiy partiyadan nomzodlar ishtirok etmoqda:

 

– Xalq demokratik partiyasidan koʻrsatilgan nomzod Ulugʻbek Ilyosovich Inoyatov;

 

– Tadbirkorlar va ishbilarmonlar harakati – Oʻzbekiston liberal-demokratik partiyasidan Shavkat Miromonovich Mirziyoyev;

 

– Oʻzbekiston “Adolat” sotsial-demokratik partiyasidan Robaxon Anvarovna Maxmudova;

 

– Oʻzbekiston Ekologik partiyasidan Abdushukur Xudoyqulovich Xamzayev.

 

Oʻzbekiston “Milliy tiklanish” demokratik partiyasi Prezident saylovida Tadbirkorlar va ishbilarmonlar harakati – Oʻzbekiston Liberal-demokratik partiyasidan koʻrsatilgan nomzodni qoʻllab-quvvatlashga qaror qilganligi Sizlarga maʼlum.

Hurmatli brifing ishtirokchilari!

 

Videokameralar saylovchilarning ovoz berish jarayoni, koʻrib turganingizdek, Markaziy saylov komissiyasining Matbuot markazida katta ekranda, saylov.uz veb-saytida hamda Oʻzbekiston Respublikasi Milliy teleradiokompaniyasining “Oʻzbekiston24” va boshqa telekanallarda onlayn tarzda kuzatish imkoniyati yaratildi.

 

Hozirga qadar olingan maʼlumotlarga koʻra, Prezident saylovi xalqaro meʼyorlar va standartlarga mos milliy saylov qonunchiligimizga, unda belgilangan ochiqlik, oshkoralik va adolat kabi xalqaro demokratik prinsiplarga toʻla mos holda, koʻtarinki ruhda oʻtkazilmoqda.

 

Saylov kodeksiga binoan, Oʻzbekiston Respublikasining har bir saylovchi teng saylov huquqiga ega. Saylovda erkin va yashirin ovoz beriladi. Ovoz beruvchilarning xohish-irodasi nazorat qilinishiga yoʻl qoʻyilmaydi.

 

Saylov qonunchiligiga muvofiq, sogʻligʻining holati yoki boshqa sabablarga koʻra ovoz berish binosiga kela olmaydigan saylovchilar uchun uchastka saylov komissiyalari tomonidan imkoniyatidan kelib chiqib ovoz berish oʻsha saylovchilar turgan joyda tashkil etiladi.

 

Saylovni oʻn beshta xalqaro tashkilot, 47 ta xorijiy davlatdan tashrif buyurgan jami sakkiz yuz nafarga yaqin xalqaro kuzatuvchi bevosita kuzatib bormoqda.

 

Prezidentlikka nomzod koʻrsatgan siyosiy partiyalar va fuqarolarning oʻzini oʻzi boshqarish organlaridan esa 53 ming nafardan ziyod mahalliy kuzatuvchi saylovni bevosita kuzatmoqda.

 

Saylovni jami 1 400 nafar mahalliy va xorijiy ommaviy axborot vositalari vakillari yoritib bormoqda.

 

Hozirga qadar Markaziy saylov komissiyasiga saylovda ovoz berish jarayoni davomida saylov qonunchiligi buzilishi haqida maʼlumotlar kelib tushmadi.

 

Agar saylovchilar, kuzatuvchilar yoki ommaviy axborot vositalari vakillari saylov qonunchiligi buzilishi holatlarini aniqlagudek boʻlsa, ular sud, prokuratura organlari yoki saylov komissiyalariga murojaat qilishlari mumkin.

 

Buning uchun barcha saylov uchastkalarida maʼmuriy sudlar va huquqni muhofaza qiluvchi organlarining telefon raqamlari haqida maʼlumotlar mavjud.

 

Matbuot markazining majlislar zalidagi ekranda soat 11:00 holatiga saylovda qatnashganlar soniga doir dastlabki maʼlumotlarni eʼlon qilish rejalashtirilgan.

 

Eʼtiboringiz uchun rahmat!

Izoh qoldirish uchun tizimdan ro'yxatdan o'tishingiz zarur